Ungir spreyta sig

Ekki verður sýningum fyrr lokið á Flagara í framsókn í Íslensku óiperunni í Ingólfsstræti en það koma nýjar sviðsetningar upp. Það er tveir ástsælir einþáttungar eftir meistarann Giacomo Pucchini sem Óperustúdíó Íslensku óperunnar stendur fyrir: Systur Angelicu og Gianni Schicchi. Er frumsýning fyrirhuguð 21. mars. Æfingar eru komnar vel á veg og taka yfir þrjátíu söngnemendur og fjörtíu nemendur í hljóðfæraleik þátt í verkefninu.

Þetta er fjórða árið í röð sem Íslenska óperan stendur fyrir sýningarhaldi á vegum Óperustúdíós og og reynsla síðustu þriggja ára hefur sýnt að það er mikill áhugi fyrir verkefninu bæði meðal þátttakenda sem og áhorfenda. Það er Glitnir sem leggur sviðsetningunni lið með fjárstyrk. Hljómsveitarstjóri er Daníel Bjarnason og leikstjóri Ingólfur Níels Árnason. Leikmynda – og búningahönnuður Óperustúdíósins er Hlín Gunnarsdóttir og ljósahönnuður Jóhann Bjarni Pálmason.

Ingólfur Níels segir það mikilvægt fyrir söngnemendur að fá tækifæri til að taka þátt í verkefni sem þessu; „í Óperustúdíóinu fá nemendur tækifæri til að taka þátt í verkefni sem unnið er að öllu leyti eins og önnur verkefni Íslensku óperunnar og í óperuhúsum almennt. Það er hægt að líta á þátttökuna sem viðbót við námið, hér fá nemendurnir tækifæri til að spreyta sig í leiklist og sviðshreyfingum samhliða söngnum á meðan skólarnir leggja meiri áherslu á söng og raddþjálfun.” Óperustúdíóið er starfrækt í samvinnu við tónlistarskóla á höfuðborgarsvæðinu.

Einþáttungarnir tveir er löngu þekktir og hafa verið fluttir hér áður: þá samdi tónskáldið sem hluta af Þríleik og ætlaðist til að þeir væru fluttir saman, Il tabarro, Suor Angelica, og Gianni Schicchi. Verkið var frumflutt 1918 í Metropolitan Óperunni í New York. Il Tabarro er samið í ætt verismo, Systir Angelica er kirkjulegt verk meðan Gianni er kómedía. Verkefni Óperustudíósins geyma tvær víðkunnar og frægar aríur: O mio babbino caro og Senza mamma.