Ljúka nýrri plötu á árinu

Hljómsveitin Sigur Rós hefur undanfarna tvo mánuði verið upptekin í hljóðveri sínu, Sundlauginni, í Mosfellsbæ við að taka upp lög á nýja plötu.

Að sögn bassaleikarans Georgs Holm er afar líklegt að platan klárist á þessu ári. Veltur það síðan á plötufyrirtæki sveitarinnar erlendis hvort hún komi út á árinu. Georg segir að það muni koma í ljós hvort einhverjar stefnubreytingar verði á plötunni.

„Við erum búnir að klára nokkur lög en það er meira eftir að gera. Við vitum ekkert nákvæmlega hvernig hún endar. Við erum bara að gera tilraunir eins og er. Sum af þessum lögum eru líka gömul lög sem við sömdum fyrir svolitlu síðan. Efni sem var aldrei klárað og hefur því aldrei verið gefið út. Við ákváðum að það væri tími til kominn að klára það," segir hann.

Sigur Rós mun hafa í nógu að snúast á næstunni. Auk þess að vinna í plötunni og tónleikamynd sinni sem var tekin upp hérlendis á síðasta ári mun sveitin spila á fjáröflunartónleikum til styrktar Tíbet þann 26. febrúar í Carnegie Hall í New York. Þetta verður í fyrsta sinn sem hljómsveitin spilar á þessum þekkta tónleikastað.

Patti Smith, sem hélt tónleika hér á landi á síðasta ári, og tónskáldið heimsþekkta Philip Glass munu einnig koma fram. Daginn fyrir tónleikana mun Sigur Rós flytja tónlist sína við dansverk Merce Cunningham, Split Sides, í Miami.

„Þetta er árlegur viðburður sem Glass er að sjá um. Hann hafði samband við okkur og vildi fá okkur til að koma. Við verðum úti í Bandaríkjunum á þessum tíma þannig að við ákváðum að skella okkur," segir Georg. „Við viljum styrkja og styðja við bakið á þessum málstað. Okkur hefur áður verið boðið að koma og spila en aldrei séð okkur fært að mæta."

Sigur Rós mun aðeins spila eitt lag á tónleikunum og segir Georg líklegast að Heysátan, lokalag síðustu plötu sveitarinnar, Takk, verði fyrir valinu. „Við verðum ekki þarna úti til að spila á okkar eigin tónleikum og þess vegna verðum við með voða lítið af græjum. Það eru fá lög sem við getum spilað án þess að vera með þrjú tonn af hljóðfærum, þannig að það verður að vera Heysátan," segir hann.