Samfés yfirstaðið

Á nýafstöðnu landsmóti Samfés, samtaka félagsmiðstöðva á Íslandi, var mikil og þétt dagskrá frá föstudeginum 29. September til 1. október. Hátíðin var opnuð með heimsókn formanns ÍTR sem reyndi meðal annars að kenna þátttakendum að klappa með annarri hendi.

Eins var var sett óopinbert heimsmet í "Samvinnuhringnum". Samvinnuhringurinn snýst um samvinnu, traust og stuðning. Þátttakendurnir á landsmótinu, alls um 400 talsins mynduðu hring og héldu í band sem bundið var saman í hring. Hringurinn var um 50 metrar í þvermál og svo framkvæmdi hópurinn allskyns þrautir eins og að hall sér aftur á bak, treystandi á stuðning af bandinu og að setjast niður og standa upp.

Eins og áður sagði tóku nærri 400 unglingar allsstaðar að af landinu þátt í landsmótinu sem haldið var í 16. sinn. Þema mótsins var FJÖLMENNING. Í tilefni þess var móttökudeildum í Reykjavík og víðar boðið að senda þátttakendur á Landsmótið og samstarf var haft með hinum ýmsu aðilum sem koma að málefnum innflytjenda og fjölmenningu.

Forseti Íslands, herra Ólafur Ragnar Grímsson, heiðraði landsmótsgesti með nærveru sinni og hitti fjölmarga unglingana í smiðjum sem þau voru þátttakendur í . Ein þeirra var útivistarsmiðja í Nauthólsvík, í annarri var fjallað um fordóma og fjölmenningu og sú þriðja var leiklistarsmiðja en alls voru smiðjurnar 20 talsins. Samfés leggur mikla áherslu á að unglingalýðræði sé í hávegum haft í félagsmiðstöðvum landsins, en þær telja í dag um 90.

Á landsmótinu var kosið í fyrsta Ungmennaráð Samfés en hlutverk þess er að tryggja áhrif ungs fólk innan Samfés og um leið að skapa vettvang fyrir lýðræðislega umræðu. Það eru 18 fulltrúar úr félagsmiðstöðvum víðsvegar af landinu sem eiga sæti í ráðinu.

Gífurleg gróska er í starfi félagsmiðstöðvanna í landinu en samkvæmt nýjustu könnun Rannsóknar og Greiningar kemur í ljós að um 65 % unglinga 13 - 16 ára sækja þær að staðaldri. Fagþekking á sviði frítímans hefur aukist jafnt og þétt og kröfur um fagleg vinnubrögð að sama skapi.

Samfés stendur fyrir starfsdögum síðar í þessum mánuði á Steinsstöðum í Skagafirði þar sem starfsmönnum félagsmiðstöðva er boðinn ýmis fróðleikur til þess að auka enn á fagþekkingu og samræmingu í starfi félagsmiðstöðvanna á Íslandi.