Hitabylgja verður mönnum að aldurtila

Hitamet falla nú víða um Evrópu og hefur hitinn orðið nokkrum Evrópubúum að aldurtila. Segja heilbrigðisyfirvöld víða um Evrópu að hitabylgjan nú sé farin að minna á alræmda hitabylgju sumarið 2003 þegar í það minnsta 20 þúsund manns létust í Evrópu af völdum hitaslags og ofþornunar. Nú er fólk þó hvatt til að læra af reynslunni: halda sig í skugganum eða loftkældum rýmum og drekka ríflega af vatni. Franski orkurisinn EDF hefur nú þurft að draga úr framleiðslu í kjarnorkuverum sínum og hefur beðið stærstu viðskiptavini sína að draga úr rafmagnsnotkun. Ítölsk bændasamtök hafa áhyggjur af uppskerunni þetta sumarið og segja þetta verstu þurrkatíð í áratugi.