Snorri Ásmundsson á heimaslóðum

Snorri Ásmundsson opnar sýningu Laugardaginn 15 Júlí klukkan 16.00, hjá Jónas Viðar gallerí að Kaupvangstræti 12 Akureyri. Snorri hefur komið víða við í listsköpun sinni og á að baki sérkennilegan feril sem listamaður. Snorri hefur verið mjög umdeildur og hafa gjörningar hans oftar en ekki snert viðkvæma strengi hjá samborgurum.

Snorri hefur oft verið kallaður Emil í Kattholti þeirra Akureyringa, enda prakkarastrikin mörg í gegn um tíðina. Akureyringar hafa að þeim sökum, oft hugsað Snorra þegjandi þörfina en árið 1999 fékk Snorri fékk uppreisn æru sinnar þegar hann var gerður að stórriddara Akureyrar-akademíunnar og ári seinna sæmdur að heiðursborgara á Akureyri.

Listferill Snorra er að taka nýja og spennandi stefnu um þessar mundir og árangur af áralöngum, átakanlegum rannsóknum hans og tilraunum eru að skila sér í sköpunarferlið. Snorri sýndi sitt fyrsta Orkuflámaverk í Lystigarðinum á Akureyri fyrir 10 árum síðan, það eru einmitt. Orkuflámamálverk sem Snorri sýnir hjá Jónas Viðar gallerí

Snorri hefur þróað með sér þessa andlegu tækni í málaralist í gegn um árin sem hafa vakið sterk áhrif hjá sýningagestum og hafa Orkuflámamyndir hans jafnvel verið taldar hafa lækningarmátt.

"Ég hef heyrt mjög magnaðar frásagnir frá eigendum verkanna sem hafa glatt mig og hvatt til að halda áfram að mála Orkuflámamyndir. Stundum er löng bið á milli þess sem ég mála þær en ég þarf að vera í góðu andlegu jafnvægi til þess.

Orkuflámamálverkin eru því bæði sjónprýði og andleg batterí."

"Það gleður mig mikið að geta opnað Akureyringum dyr að hinum andlega heimi með því að sýna þeim Orkuflámaverkin. Akureyringar jafnt sem aðrir landsmenn hafa fjarlægst andlegum tengingum, en ég held að fólk sé að vakna til vitundar um að hið efnislega er ekki hægt að njóta til fullnustu nema með hinu andlega.

Listin er meðal annars verkfæri Guðs til að eiga samræður við fólk og við myndlistarmenn berum því mikla ábyrgð."

Sýningin mun standa til 30 Júlí.