Samstöðu- og styrktartónleikar á Grand Rokk

Samstöðu- og styrktartónleikar fyrir konur í Palestínu

Á Grand rokk, fimmtudaginn 25. maí, kl. 21.00

Félagið Ísland-Palestína og UNIFEM á Íslandi standa fyrir samstöðu- og styrktartónleikum fyrir konur í hertekinni Palestínu fimmtudaginn 25. maí á Grand rokk, Smiðjustíg 6.

Tónleikarnir eru upphafið að söfnunarátaki þar sem allur ágóði rennur til palestínskra kvennasamtaka sem starfa á sviði mannúðar- og mannréttindarmála á herteknu svæðunum. Húsið opnar klukkan 21.00. Tónleikarnir hefjast 21.30. Aðgangseyrir er 500 krónur.

Fram koma: Reykjavík!, Future Future, Wulfgang, Seabear og Mr. Silla (spilar plötur)

Sérhannaðir bolir og peysur frá Dead og Nakta apanum verða til sölu á tónleikum, auk mynda gerða af Hugleiki Dagssyni. Einnig verða til sölu bolir, nælur og geisladiskar frá Félaginu Ísland-Palestína.

Ágóði af miðasölu og sölu á varningi rennur til palestínskra kvennasamtaka sem starfa á sviði mannúðar- og mannréttindarmála í hertekinni Palestínu - m.a. Bisan rannsóknar- og þróunarsetursins í Ramallah á Vesturbakkanum.

Hljómsveitin Reykjavik! hefur farið mikinn í tónleikhaldi undanfarið og getið sér gott fyrir kraftmikla rokktónlist og frækilega sviðsframkomu á tónlistarhátíðunum Iceland Airwaves og Aldrei fór ég suður. Frumburður hennar 'Glacial landscapes, religion, oppression and alcohol' kemur út á næstu dögum, en þetta mun vera er eitt síðasta tækifærið til að sjá Reykjavík! á sviði í nokkurn tíma því við mánaðamót hefst árlegt tveggja mánaða sumarfrí hennar.

Liðsmenn Future Future hefur einnig verið duglegir við hljómleikahald undanfarið og gert það gott með laginu "Code Civil"sem náð hefur miklum vinsældum meðal hlustenda útvarpstöðvana XFM og X-ins.

Það sama má segja um lag rokksveitarinnar Wulfgang "Machinery" sem nú situr í efstu sætum X-listans og XDómínós vinsældarlista XFM.

Seabear hefur vakið verðskuldaða athygli undanfarið fyrir frumlegar lagasmíðar og skemmtilega tónleika. Sveitin hitaði fyrir New York bandið The Books í Berlín í febrúar og lék núna í maí í París á tónleikum með Apparat Organ Quartet og Benna Hemm Hemm. Seabear hefur meðal annars unnið sér það til frægðar að deila smáskífu með Grizzly Bear (Warp Records) - þar sem hvor hljómsveitin átti eitt lag á á sitthvorri hliðinni á 7" vinyl skífu sem Tomblab Records gaf út. Hún gaf nýlega út plötuna Singing Arc EP og sögusagnir eru uppi um að hin virta þýska plötuútgáfa Morr Music sé á höttunum eftir plötusamningi við bandið.

Söngkonan Mr. Silla vakti verðskuldaða athygli á síðustu Airwaves hátíð og hefur einnig gert það gott sem fjórðungur hljómsveitarinnar Fræ. Hún stóð sig frábærlega á síðustu samstöðutónleikum fyrir Palestínu á Grand rokk 29. nóvember, en að þessu mun hún hins vegar ekki spila "live" heldur leika eitthvað af sinni uppáhaldstónlist sem plötusnúður í upphafi kvölds og á milli atriða.