Listamaður í hverri ætt

Fjallað var ítarlega um íslensku tónlistarútrásina í breska dagblaðinu The Independent á dögunum. Greinarhöfundur var viðstaddur afmælistónleika Sykurmolanna í Laugardalshöll og furðar sig á hversu mikið af hæfileikafólki geti komið frá þessari litlu eyju.

„Frá upphafi Sykurmolanna, hefur verið stöðugur straumur hljómsveita sem hafa farið ótroðnar slóðir, sérstaklega hin hugljúfa Sigur Rós, en einnig danshljómsveitin gus gus og hin tilraunakennda múm," segir í grein Chris Mugan í The Independent.

Hann spyr jafnframt hvernig mögulegt sé að þessi litla eyja í Atlantshafi geti haft áhrif á heimsvísu. „Þegar Sykurmolarnir byrjuðu á seinni hluta níunda áratugar, fannst Íslendingum þeir greinilega vera einangraðir. Höfuðborgina vantaði næturlífið sem hún getur stært sig af í dag og það er engin furða ða hver einasta fjölskylda innihélt rithöfund, kvikmyndagerðarmann eða tónlistarmann," skrifar Mugan.

Tilraunaeldhúsið vekur mikinn áhuga blaðsins, en það er útgáfufyrirtæki og samstarfsvettvangur fyrir listamenn, sem var stofnaður 1999 af Jóhanni Jóhannssyni, Kristínu Björk Kristjánsdóttur og Hilmari Jenssyni. Úr Tilraunaeldhúsinu hafa margar hljómsveitir sprottið upp, meðal annars Apparat Organ Quartet. Mugison, múm og Jónsi í Sigur Rós hafa öll verið viðriðin starfsemi Tilraunaeldhússins.

Þó gerir greinarhöfundur sér ekki fyllilega grein fyrir íslenskum nafnavenjum, en Einar Örn Benediktsson, söngvari Sykurmolanna, er einfaldlega kallaður Orn í greininni. Það kemur þó ekki að sök og hljóta Sykurmolarnir og hinar íslensku hljómsveitirnar mikið lof í greininni.