Nýtt starfsár hafið hjá Sinfóníu Norðurlands

Vetur er að leggjast yfir Norðurland og þá taka hljóðfæraleikarar í Sinfóníuhljómsveit Norðurlands að stilla saman strengi sína. Fjórtánda starfsár þeirra er að hefjast. Skólatónleikar skipa stóran sess í dagskrá vetrarins.

Nú í haust hófust skólatónleikar í október þar sem á efnisskrá er tónverk eftir hollenskt tónskáld Theo Loevendie við ævintýrið um Næturgalann eftir H.C. Andersen. Þar eru á ferðinni sjö hljóðfæraleikarar, sögumaður og stjórnandi. Sögumaður er Aðalsteinn Bergdal. Í vetur verður farið í skóla frá Ólafsfirði og allt austur á Raufarhöfn. Næturgalinn verður síðan fluttur á Fjölskyldutónleikum á laugardaginn kl. 14 í Samkomuhúsinu á Akureyri - (Leikhúsinu). Aðgangur að fjölskyldutónleikunum er ókeypis.

Næstu tónleikar hljómsveitarinnar á Akureyri verða síðan hinn 9. desember: Sinfóníuhljómsveit Norðurlands og Knattspyrnudeild Þórs bjóða til aðventuveislu. Með hljómsveitinni koma fram Hulda Björk Garðarsdóttir, Ólafur Kjartan Sigurðarson og Karlakór Dalvíkur. Á efnisskrá tónleikanna verður jóla- og aðventutónlist. Að tónleikunum loknum verður boðið upp á jólahlaðborð frá Bautanum. Verkefni eftir áramótin eru af ýmsum toga. Í febrúar heimsækir Sinfóníuhljómsveit Íslands Akureyri og verður með tónleika í Íþróttahúsi Síðuskóla.

Strengjasveitatónleikar verða í mars í Akureyrarkirkju. Tónleikarnir eru í samvinnu við Tónlistarskólann á Akureyri. Á skírdag verða tónleikar í Glerárkirkju. Á efnisskrá tónleikanna er konsert fyrir fiðlu og hljómsveit eftir Max Bruch þar sem fiðluleikarinn Ari Þór Vilhjálmsson verður í aðalhlutverki. Einnig verður flutt sinfónía no. 5 eftir L. van Beethoven sem nefnd hefur verið Örlagasinfónían. Þá eru fyrirhugaðir tónleikar í maí í samstarfi við Kirkjulistaviku Akureyrarkirkju og eru á efnisskrá sinfónía fyrir orgel og hljómsveit eftir F.A. Guilmant og Te Deum eftir A. Dvorak. Við fyrirhugaða kórastefnu við Mývatn í júní verður meðal annars flutt messa eftir John Rutter.

Hljómsveitin er skipuð hljóðfæraleikurum víða að. Var nokkur umræða fyrr á árinu um lakan hlut hljóðfæraleikara sem byggju norðan heiða og var gagnrýnt að sóttir væru menn í aðra landshluta til að manna sveitina. Stjórnandi Sinfóníuhljómsveitar Norðurlands er Guðmundur Óli Gunnarsson.