Lúxushamborgari með sætum kartöflum

Brynja Baldursdóttir deildarstjóri hjá Símanum er þekkt fyrir góða takta í eldhúsinu meðal vina og vandamanna. Hér gefur hún uppskrift þar sem einfaldleikinn er í fyrirrúmi.



Ég smakkaði þennan borgara fyrst á lítilli hamborgarabúllu í Los Angeles, Fathers Office. Vinkona mín sem býr í LA var svo snjöll að finna út hvað var í borgaranum. Það er rúmlega ár síðan ég fékk uppskriftina en ég breytti henni svolítið og pússlaði þessu saman, segir Brynja, en lúxushamborgararnir vekja alltaf mikla lukku í matarboðum Brynju. Ég hef eldað þetta mjög oft og viðheld þeirri reglu sem er á veitingastaðnum að það er ekki hægt að breyta eða bæta. Þetta er bara hinn fullkomni hamborgari, hin eina og sanna uppskrift, segir Brynja. Hún segir að meðlætið, sætar kartöflur með hvítlauksrjómaosti og sýrðum rjóma, sé ómissandi, en það er einnig ættað frá Fathers Office.



Brynja er dugleg að prófa eitthvað nýtt þegar hún eldar. Ég er hrifnust af réttum þar sem hráefnið fær að njóta sín og einfaldleikinn er í fyrirrúmi. Ég vil ekki drekkja hráefninu í kryddi og sósum, segir hún. Hún mælir með lúxushamborgarakjöti frá Gallerí Kjöti en ciabatta brauðin er hægt að fá í flestum bakaríum og stórverslunum.

LA borgari fyrir fjóra:

4 200 gr. hamborgarar

4 ciabatta brauð

Rucola salat

Gráðaostur

Salt

Pipar

Sultaður laukur:

2 laukar

hálft box sveppir (má sleppa)

5-6 msk púðursykur



Meðlæti:

2-3 sætar kartöflur

ein dós hvítlauksrjómaostur (t.d. Boursin)

ein dós sýrður rjómi

Aðalatriðið er sultaði laukurinn. Það má alveg setja nóg af púðursykri og ég set stundum miklu meira en ég tilgreini hér, segir Brynja. Fyrst eru laukurinn og sveppirnir skornir í hæfilega bita og brúnaðir á pönnu í ólífuolíu þangað til laukurinn er gylltur. Þá er púðursykrinum bætt útí. Gott getur verið að setja eina til tvær matskeiðar af sjóðandi vatni á pönnuna um leið og sykurinn er settur útá. Þá er lok sett á pönnuna og þetta látið malla í minnst hálftíma.

Hamborgararnir eru grillaðir á útigrilli en hægt er að steikja þá á pönnu ef veðrið býður ekki upp á grill. Hamborgararnir eru saltaðir og pipraðir og undir lokin er gráðaosti bætt ofaná. Hamborgararnir eru bornir fram í ciabatta brauðinu með rucolasalati og sultaða lauknum.

Kartöflurnar eru skornar í ræmur eða bita og settar í eldfast mót. Þá er ólífuolía sett útá og sjávarsalt mulið yfir.

Þetta er bakað við háan hita í ofni í ca. hálftíma. Hvítlauksrjómaostinum og sýrða rjómanum er blandað saman og sósan er borin fram með kartöflunum.