Á jólasýningu Handverks og hönnunar í Aðalstræti tekur á móti manni jólatré fagurlega skreytt með litlum glettilegum tréfígúrum. Kerlingar í blómakjólum og hreindýr með horn úr palíettum gægjast á milli trjágreina og er ekki annað hægt en að brosa þegar komið er að trénu og þessi litlu augu blikka mann eitt augnablik. Allt er þetta sköpunarverk Páls Garðarssonar sem einnig gerir engla úr tré sem geta staðið á borði og heila englahljómsveit sem hangir í glugga.
