Piparkökubyggingar

Ilmurinn af nýbökuðum piparkökum er í hugum marga bundinn við jólin, og hafa margir náð ágætis leikni í að skreyta kökurnar. Það eru hins vegar mun færri sem náð hafa tökum á listinni að búa til hús úr piparkökudeigi. Snillingarnir sem taka þátt í piparkökuhúsaleik Kötlu ár eftir ár láta okkur hin fyllast minnimáttarkennd en að þessu sinni má sjá nákvæmar eftirlíkingar af Hallgrímskirkju, Alþingishúsinu og Hogwartskastala svo fátt eitt sé nefnt. Áhugasamir geta barið húsin augum í Kringlunni þessa dagana og fengið innblástur.