Þröstur Leó aftur til Keflavíkur

Þröstur Leó Jóhannsson er genginn í raðir Keflavíkur á nýjan leik eftir tvö ár í herbúðum Þórs Ak. Þetta kemur fram á karfan.is.

Þröstur Leó, sem er 28 ára, skrifaði undir tveggja ára samning við uppeldisfélag sitt. Auk Keflavíkur og Þórs lék Þröstur Leó með Tindastóli á árunum 2011-13.

Þröstur Leó var með 6,6 stig, 4,1 frákast og 1,4 stoðsendingu að meðaltali í leik í Domino's deildinni í vetur. Þórsarar höfnuðu í 8. sæti deildarinnar og féllu svo úr leik fyrir KR í 8-liða úrslitunum.

Keflvíkingar enduðu í 6. sæti Domino's deildarinnar í vetur en féllu úr leik fyrir KR í undanúrslitunum.